Crime of passion, illegal drugs ginasundan nga anggulo sang ICPO sa pagpatay sa lalaki nga nasapwan wala sang ulo kag butkon

Ginapadalman sang Iloilo City Police Office ang imbestigasyon sa pagpatay sa lalaki nga nasapwan nga wala sang ulo kag mga butkon sa Buhang, Jaro kahapon.

Sa press conference kaina sang aga, ginpresentar ni ICPO Director PCOL Joeresty Coronica nga may ginasundan na sila nga anggulo sa krimen.

Crime of passion kag illegal drugs ang posible nga rason sa pagpatay sa lalaki nga gin-claim sang iya pamilya nga si Kristopher Cabalquinto, 32 anyos sang Brgy. 7, Poblacion, San Miguel, Iloilo.

Pero gin-athag ni Coronica nga gina-imbestigaran nila ang iban pa nga posible anggulo.

May inisyal nga impormasyon suno kay Coronica nga may kahilabtanan sa illegal nga druga si Cabalquinto pero indi sa siyudad.

Sang nasapwan ang bangkay, may nakita nga sachet sang suspected shabu nga naipit sa underwear sini.

Ginpanindugan naman ni Coronica nga wala sang kahilabtanan ang police sa natabo kay Cabalquinto.