ILOILO — Desidido nga magpadalagan bilang vice governor si Iloilo 5th District Congressman Raul “Boboy” Tupas sa 2025 midterm elections.
“I am 90 percent open that I will run for vice governor, matagaan lang maayo nga lawas, matagaan gid tsansa. Ngaa nagbilin pa kita sang pila pa ka porsyento because nabal-an ta nga wala man sang absolutely, there is always an all-knowing, all-loving, all-powerful God. Siya ni ‘ya ang makabalo kun diin gid ang aton direksyon, ano ang maging ultimate decision kag kun ano man ang maging decision sang aton mga pumuluyo,” suno kay Tupas.
Subong nga gab-i, nagsumpa si Tupas sa Lakas-Christian Muslim Democrats (CMD) sa diin chairman si House Speaker Martin Romualdez.
Gin-aku ni Tupas nga wala pa sila sang pormal nga pag-istoryahanay ni Governor Arthur Defensor, Jr., sa posibilidad nga pag-tandem nila sa masunod nga eleksyon. Madumduman nga may yara sang alyansa ang Lakas-CMD kag Partido Federal ng Pilipinas sa diin regional chairman si Defensor.
Isa ang ngalan ni Tupas sa mga nagguwa nga mapadalagan nga bise gobernador sa masunod nga eleksyon kag manugtapos na ang iya termino bilang kongresista sang quinto distrito.
