Masobra P1.1 million nga balor sang suspected shabu na-recover sa drug buy bust sa Molo

ILOILO— Na-recover ang masobra P1.1 Million nga balor sang suspected shabu sa drug buy bust operation sa 3rd Juntado Street, Calumpang, Molo kagab-i, Oktubre 7.

Subject sang operasyon si John Nathaniel Cañete, 18-anyos sang Calaparan, Arevalo.

Suno kay Police Captain Ryan Christ Inot, head sang City Drug Enforcement Unit (CDEU), ang subject ang isa sa mga nagadul-ong sang dako nga supply sang illegal drugs sa amo nga lugar.

Gina-verify sang police ang impormasyon halin sa subject nga sa BJMP-Ungka niya ginakuha ang supply sang illegal drugs, suno kay Inot.

Indi pa matul-id sang police kun personnel ukon preso sa BJMP ang ginatumod sang subject.

Natyempuhan suno kay Inot nga subong nga adlaw nag-abut ang bag-o nga supply sang illegal drugs nga idul-ong sang subject sa amo nga lugar.

Na-recover ang 170grams sang suspected shabu nga may standard drug price nga P1,186,000.

Sa pagpangusisa ni Inot, menor-de-edad pa lang nagadul-ong na sang illegal drugs ang subject sa siyudad. — via Aksyon Farrah Mae Morano