9 ka kompaniya mapasakop sa Floats Parade of Lights sang Dinagyang Festival 2025
ILOILO CITY — Siyam ka mga kompaniya ang mapaindis-indis sa maduagon kag matahum nga Floats Parade of Lights sang Dinagyang ILOmination, isa sa mga ginabantayan sa Dinagyang Festival 2025.
Lakip diri ang Inggo Batchoy by the Lozada Family for Señor Sto. Niño Float, Robinsons Malls, Jollibee, Chowking, Sagility, International Pharmaceutical, Inc. (IPI), Cebu Pacific, Palawan Pawnshop, kag Ritmo Tambores.
Kaupod sang mga participating teams ang mga bantog nga lighted festivals sa bug-os nga pungsod nga nagapasakop sa Dinagyang ILOmination Streetdance Competition ang magadugang sang kasanag sa selebrasyon.
Ang mga competing tribes, maparada halin sa Atria Park District padulong sa SM City Iloilo sa diin sila ma-perform, kag madiretso sa Iloilo Business Park sa Mandurriao nga masugod las-seis sa gab-i.
Lakip sa nagapasakop sa Dinagyang ILOmination ang Bailes de Luces sang La Castellana, Negros Occidental, Puvvurulun Affi Festival sang Tuguegarao City, Cagayan, Tanglawan Festival sang San Jose del Monte, Bulacan, kag Pandang Gitab Festival sang Oriental Mindoro.
Mangin guest performer naman ang Bana-ag Festival sang Anilao kag Tribu Sidlangan sang Iloilo City.
