ILOILO CITY — Ginabanta sa P150,000 nga kuwarta kag alahas sang lending company ang nataban sa sulod sang apartment sa Brgy. Guzman-Jesena, Mandurriao kahapon, Hulyo 13.
Suno kay Police Captain Joebert Amado, officer-in-charge sang Iloilo City Police Station 5 sa Mandurriao, duha ka Indian nationals ang nagkadto sa police station kag gin-report ang natabo.
Sa inisyal nga imbestigasyon sang police, pagbugtaw kaina sang aga sang mga nagatinir sa apartment, natalupangdan nga nagalinapta ang mga gamit sa kwarto sa 2nd floor kon sa diin nakatago ang kuwarta kag mga alahas.
Base sa CCTV footage nga nakuha sang police, nakit-an nga may nagtaklas nga lalaki sa gate kag makaligad ang 15 minutos may bitbit na nga bag pagguwa sa lugar.
Ginpahayag sang police nga positibo nga na-identify sang mga nagatinir sa establisyimento ang bag nga may unod sang kuwarta.
Dugang pa ni Amado, indi ma-identify sang mga tagreklamo ang lalaki nga naka-jacket.
Padayon ang imbestigasyon sang police sa natabo. — Aksyon Paula Elambayo
