ILOILO CITY — Na-recover ang P1,028,000 nga balor sang suspected shabu sa buy bust operation sang Iloilo City Drug Enforcement Unit (CDEU) sa Brgy. San Isidro, Jaro kagab-i, July 16.
Ginkilala ang main subject kay alyas Macmac, 46-anyos, taga-Lapuz pero temporaryo nagatinir sa Brgy. San Juan, Molo; alyas Nonong, 45-anyos kag alyas Kyle, 18-anyos lunsay residente sang amo nga barangay.
Suno kay Police Captain Roque Gimeno III, officer-in-charge sang CDEU, si Macmac ang nagadul-ong sang illegal items sa balay ni Nonong kag ginabaligya.
Sa monitoring sang police, ginahimo nga “look-out” ang 18-anyos sa mga transaksyon.
Ginpahayag ni Gimeno nga nagtuyo pa magpalagyo si Nonong pero gilayon nga nadakpan sang kapulisan.
Nagdugay sang tatlo ka semana ang monitoring sang police sa subject tubtob nga nadakpan.
Indi pa mabuyagyag sang police kon diin sa Iloilo City nagakuha sang supply sang illegal drugs ang subject tungod i-verify pa nila.
Nagabug-at sang ginabanta 150 grams ang mga na-recover nga suspected shabu sa subject. — Aksyon Paula Elambayo
