Ginkumpirmar ni Antique Local Disaster Risk Reduction Management Officer (LDRRMO) 4 Michael Tolentino nga pito ka mga banwa sa probinsya ang ginbaha tungod sang sige-sige nga ulan dalan sang Bagyo “Crising” halin kaina sang kaagahon.
Ini amo ang Culasi, Sebaste, Lauan, Bugasong, Tibiao, San Jose kag Sibalom.
Ginpahayag ni Tolentino nga nagalab-ut sa tuhod ang baha kag nag-awas ang mga suba nga naglab-ut sa mga balay sa Culasi, Sebaste, Lauan, Bugasong, kag Tibiao kag may mga residente na nga ginpang-evacuate.
Samtang, nagdesisyon naman ang mga otoridad nga i-evacuate ang mga residente sa San Jose kag Sibalom bisan nga indi masyado mataas ang lebel sang tubig para sa ila safety tungod sa nagapadayon nga ulan.
Padayon nga naga-monitor ang LDRRMO sa sitwasyon suno kay Tolentino.
Suspendido suno sa iya ang klase sa tanan nga mga eskwelahan sa bilog nga probinsya.
900 KA INDIBIDWAL ANG NAG-EVACUATE
Ginabanta sa 200 ka pamilya ukon 900 ka mga indibidwal ang nag-evacuate sa pito ka mga banwa.
Base ini sa initial report sang LDRRMO halin sa Culasi, Sebaste, Lauan, Bugasong, Tibiao, San Jose kag Sibalom nga apektado sang pagbaha.
Ginapana-aw ni Tolentino nga madugang pa ang amo nga numero tungod nagapadayon pa ang ila assessment kag monitoring sa mga apektado nga pamilya.
Magluwas sini, may na-record man nga landslide sa Sebaste, Barbaza kag Patnongon nga nag-apekto sa pila ka dalan.
Indi maagyan sang mga heavy vehicles ang taytay sa Brgy. Abiera, Sebaste tungod gin-ab ab sang tubig ang iya pundasyon.
