AKLAN— Arestado sa entrapment operation ang babaye sa Kalibo tungod ginpahayag naga-engage sa illegal fixing activities.
Sa impormasyon, naga-arrange ang babaye sang driver’s license transaction sa guwa sang required procedures sang Land Transportation Office (LTO).
Ginhimo ang operasyon sang mga personnel sang Kalibo Municipal Police Office upod sa LTO Kalibo District Office.
Una na nga nagdangop kay LTO- Kalibo chief, Engr. Marlon Velez ang senior citizen nga taga-Numancia, Aklan tungod delay ang pag-release sang iya driver’s license.
Natukiban sa Land Transportation Management System (LTMS) nga gin-process sa iban nga rehiyon ang lisensya sang senior citizen. Diri kag nagpabutyag ang tagreklamo nga wala man siya nakabiyahe sa iban nga lugar para magproseso sang lisensya.
Base sa imbestigasyon sang pulis, nagbayad sang P12,000 ang tagreklamo para sa transaction. Nagpromisa ang fixer sa tagreklamo nga makuha ang lisensya nga indi na makompleto ang usual requirements lakip ang medical certificate, Theoretical Driving Course (TDC) ukon Practical Driving Course (PDC) certificates, kag ang required examination.
Nagpasa man ang fixer sang litrato nga nagapakita sang driver’s license number, sang senior citizen pero sang gin-verify sang LTO, natukiban nga wala ini gin-issue sang LTO District Office sa Western Visayas.
Sang nag-schedule na ang fixer sa pag-release sang lisensya, nakig-angut ang tagreklamo sa LTO gani nakaplano sang entrapment operation.
Presu na ang suspect sa Kalibo Municipal Police Office kag magapangatubang sa violations sang Article 172 sang Revised Penal Code kag Section 21(h) sang Republic Act No. 11032, ukon Ease of Doing Business and Efficient Government Service Delivery Act of 2018.
