Freelance rider nakuhaan sang masobra tunga sa million nga balor sang suspected shabu sa Don Esteban, Lapuz

ILOILO CITY — Na-recover ang masobra tunga sa million nga balor sang suspected shabu sa drug bust operation sa Barangay Don Esteban, Lapuz las-7:35 kagab-i, Abril 27.

Suno kay Police Captain Roque Gimeno III, chief sang City Drug Enforcement Unit (CDEU), tokhang surrenderer ang subject nga si alyas Bong-bong, 37-anyos nga freelance delivery rider kag may kaso nga robbery pero nakapiyansa.

Na-monitor ang mga transaksyon sang subject tungod nahibaluan nga ginagamit niya ang iya trabaho nga delivery rider agud magkuha kag magdul-ong sang illegal nga druga.

Ginpabutyag ni Gimeno nga yara sa La Paz ang ginakuhaan ni Bong-bong sang illegal nga druga pero nagpamalibad siya sa paghatag sang ngalan tungod subject for validation ini.

Nakuha sa operasyon ang 13 ka sachets sang suspected shabu nga ginabanta nagabug-at 85 grams. — Aksyon Maria Kayla Tingzon