ILOILO— Nagtukod sang Special Investigation Team (SIT) ang Iloilo City Police Office (ICPO) agud mag-imbestigar sa kamatayon ni Patrolman Dande Luis Tayhon nga nasapwan sa Iloilo River sang Hulyo 20 sang aga.
Ginapamunuan ang SIT ni ICPO Director Police Colonel Kim Legada, upod kanday Captain Val Cambel nga hepe sang Police Station 10 kag nagkalain-lain nga units sang ICPO.
Nagahimo ang SIT sang backtracking kag pag-review sang CCTV camera footages halin sang nagguwa si Tayhon sa Kampo Delgado sang Hulyo 18 sang gab-i.
Suno kay Captain Cambel, nagguwa sa Kampo Delgado si Tayhon nga naka-angkas sa motorsiklo nga ginamaneho sang isa pa ka police officer.
Naistorya sang SIT ang pulis nga nakaupod ni Patrolman Tayhon kag nagpahayag nga nagpadulong sila sa Mandurriao pero nagbulagay sang Hulyo 19 sang kaagahon
May mga ginapang-review pa nga footages ang SIT gani indi pa ma-isa-isa ni Cambel ang gin-agyan ni Tayhon.
GINA-ENTERTAIN KON MAY FOUL PLAY UKON WALA?
Indi pa makakomento ang SIT sa resulta sang autopsy examination sa bangkay ni Patrolman Tayhon tungod wala pa sila sang official copy sang autopsy result halin sa NBI 6.
Sa subong, suno kay Captain Cambel, tanan nga posibilidad kon may foul play sa iya kamatayon ukon wala, gina-cater gihapon tungod nagapanigurado lang sila.
Sa autopsy result, wala sang pilas sa lawas si Patrolman Tayhon kag napatay tungod sa pagkalumos, base sa interview sang Aksyon Radyo Iloilo. — Aksyon Farrah Mae Morano
