Pilason ang 36-anyos nga lalaki sang natiruhan pagkatapos nagtambag sa naga-inaway nga kaupod niya sa ilimnan sa Brgy. Alibunan, Calinog Agosto 1 sang gab-i.
Ginkilala ang biktima kay Jorie Libuna Cejar, samtang suspek sa pagpangtiro si Jemar Lamis Chiva, 21- anyos, pareho nga residente sang amo man nga lugar.
Suno kay Police Major Myles Dieron, hepe sang Calinog Municipal Police Station, naga-inum-inom ang suspek kag ang biktima sa ginarentahan nga lote sang National Irrigation Administration (NIA) 6 upod ang isa pa ka lalaki nga si Elvin.
Sa imbestigasyon sang pulis, sa sige-sige nila nga inum, wala nag-intindihanay si Elvin kag ang suspek. Gulpi lang naggabot sang pusil si Chiva kag gintaya kay Elvin.
Gintambagan ni Cejar ang duha nga nagaaway apang siya ang naigo sang naglupok ang pusil ni Chiva, suno sa pulis.
Na-igu sa dughan ang biktima kag gilayon nga gindala sa ospital.
Padayon ang hot pursuit operation sang kapulisan sa suspek. — Aksyon Paula Elambayo/trainee reporter Robert Nietes
