GUIMARAS — Walo ka mga estudyante sang Remedios E. Vilches-San Lorenzo National High School sa Brgy. Suclaran, San Lorenzo ang ginkagat sang ginapatihan “ido buang” kahapon sang aga, Agosto 26.
Suno kay Ma’am Myrna Gania, head teacher III sang eskwelahan, yara sa canteen ang estudyante nga una ginkagat sang ido kag nagsunod-sunod na kutob sa malabyan sini.
Sang nakaguwa na ang ido, may ginkagat pa gid ini nga estudyante nga pakadto sa eskwelahan.
Ginapatihan nga nag-agi ang ido sa likod sang eskwelahan gani wala natalupangdan sang security guard.
Dugang ni Gania wala nagataghol ang ido kag gulpi lang nagpangkagat.
Gilayon nga gindala sa ospital ang mga estudyante agud matublukan sang anti-rabies vaccine. Outpatient na ang mga estudyante pero under observation pa.
Samtang, nadakpan sang pumuluyo sa lugar ang ido sa bulig sang mga personnel sang San Lorenzo Municipal Fire Station, Municipal Disaster Risk Reduction and Management Office, kag kapulisan.
Gin-turnover sa Municipal Agriculture Office ang ido agud mahibaluan kon “ido buang” ini.
Kahapon may duha ka mga lalaki nga nagalakat sa dalan nga ginkagat man sang amo nga ido.
Ginpabutyag ni Gania nga may residente sang barangay nga nagsapupo sa ido sang nakagawi ini sa ila balay pero wala man sang patimaan sang “pagka-ido buang” sang ginpakaon ini. — Aksyon Maria Kayla Tingzon
