ILOILO CITY — Napatay samtang ginabulong sa ospital la-1:00 kaina sang kaagahon ang delivery rider nga ginbuno sa Zone 5 Brgy. Calumpang, Molo kagab-i, Oktubre 5.
Ini ang ginkumpirmar ni Police Captain Ryan Christ Inot, officer-in-charge sang Iloilo City Police Station 4.
May pilas sa dughan ang biktima.
Una nga gin-report nga naglabay ang biktima sa atubang sang balay sang suspek upod ang duha niya ka mga abyan.
Yara sa impluwensiya sang makahulubog nga ilimnon ang biktima kag ang iya mga abyan.
Sa imbestigasyon sang police, ginsaway sang bata sang tanod ang grupo sang biktima nga indi magginahod tungod may mga nagakatulog na nga kabataan.
Tungod nakainom, gintapungol sang biktima ang bata sang tanod nga nakit-an sang amay gani nagkuha sang kutsilyo kag ginbuno ang biktima.
Detained sa Iloilo City Police Station 4 sa Molo ang suspek kag magapangatubang sang kaso. — ARI trainee Robert Nietes
