ILOILO CITY— Nag-report ang staff sang cafe sa Jaro nga gin-holdup samtang nagalakat sa El 98, Jaro kagab-i, Oktubre 25.
Sa official statement sang Aquarium Cafe & Lounge, nagalakat ang babaye nga staff sa atubang sang drug store sa tabok sang Puregold sang gintayaan sang kutsilyo sang wala makilal-an nga mga tawo kag ginhambalan nga ihatag ang iya nga wallet.
Indi kilala sang staff ang nag-agaw sang iya nga wallet nga may sulod nga masobra P2,000.
Wala naka-duty subong nga adlaw ang staff.
Nataban sang duha ka mga wala makilal-an nga mga tawo ang wallet sang staff nga may unod nga cash.
Suno kay Inday, nagguwa siya sa Aquarium Cafe & Lounge mga las-9:20 kagab-i kag naglakat pakadto sa Jaro plaza nga direksyon para makasakay sang jeep.
Ginsulod ni Inday ang iya nga cellphone sa bag, samtang gina-uyatan ang wallet nga may unod nga cash para mahapos na lang kuhaon ang plete kon may maglabay nga tricycle.
Ginpahayag ni Inday nga halin sa Puregold, nagtabok siya sa side sang drug store sang may gulpi lang nag-ulhot nga duha ka tawo. Gin-uyatan sang isa ka tawo ang iya nga butkon, gintayaan siya sang kutsilyo kag ginhambalan nga ihatag ang iya nga wallet.
Medyo madulom ang lugar gani wala na nakit-an sang klaro ni Inday ang mga suspek nga nagdalagan padulong sa Jaro plaza.
Nagpanawag si Inday sa iya nga tiya pero natyempuhan nga yara sa Roxas City. Nag-book sang mahimo masakyan si Inday agud makapauli sa Jaro.
Sang nakapauli na si Inday, nakapanugid siya sa iya nga tiya gani gin-updan nga makapa-blotter sa police station.
“WALA SANG PULIS”
Ginpabutyag ni Inday nga sa tatlo niya ka bulan nga pagtrabaho sa Iloilo, may pulis man nga nagabantay sa lugar pero natyempuhan nga wala siya sang may mapangayuan sang bulig.
Natingala man si Inday nga bisan sa unhan sang Jaro plaza, wala sang may naka-standby nga pulis.
Gin-imbestigaran sang pulis ang insidente. — Aksyon Farrah Mae Morano
