Disaster Response Team sang Coast Guard Iloilo gin-activate bilang preparasyon sa Bagyo Tino

Gin-activate sang Coast Guard Iloilo ang ila nga Disaster Response Team bilang preparasyon sa Bagyo Tino nga gina-forecast malabay sa Panay.

Suno kay Coast Guard Iloilo Commander Richard Gura, may 142 ka personnel ang CGS Iloilo nga naka-standby agud magresponde sa mga nagakinahanglan sang bulig.

Magluwas sini, preparado na ang ila duha ka aluminum kag rubber boats nga gamiton sa pagsulod sa mga lugar kon mataas na ang level sang tubig.

Dugang pa ni Gura, naka-coordinate na sila sa Municipal Disaster Team sa kabanwahanan agud ma-istoryahan ang mga dugang nga plano sa preparasyon sa bagyo Tino.

Samtang, nagpanugyan ang Coast Guard sa mga sakayan pandagat nga likawan nga magpalawod ilabe na kon nagamadlos ang hangin kag dalagku ang balod. — Aksyon Angel Mae Ciudad