Passenger’s Assistance Officer sang modernized jeep nga nagsulod sa barracks sa Lambunao patay sang ginbuno sang driver

ILOILO— Patay ang Passenger’s Assistance Officer (PAO) sang ginbuno sang driver sang modernized jeep sa sulod sang ila barracks sa Brgy. Maite Pequeño, Lambunao la-1:30 kaina sang kaagahon.

Biktima si Joabert, PAO sang modernized jeep kag residente sang Brgy. Manaulan, Lambunao samtang suspek si Benjie, 42-anyos nga driver sang modernized jeep kag residente sang Brgy. Maite Pequeño, Lambunao.

Suno kay Police Lieutenant Gabriel Manguera, OIC sang Lambunao Municipal Police Station, nagakatulog na ang suspek sa ila barracks sang nagsulod ang biktima nga hubog kag nagpanggamo.

Nabugtawan sang suspek kag ginsaway ang biktima pero wala nag-untat tubtob nagbaisay sila. Nagkuha sang kutsilyo ang suspek kag ginbuno ang biktima sa dughan.

Gindala pa sa ospital ang biktima pero gindeklarar mga dead-on-arrival.

Nadakpan naman ang suspek kag natalana pasakaan sang kaso mga homicide. — Aksyon Farrah Mae Morano