P1.3 million nga balor sang suspected shabu nakuha sa 4 ka subjects sa Brgy. Tacas, Jaro

ILOILO CITY — Arestado ang apat ka mga subjects lakip ang tanod sang Barangay Tacas, Jaro sa drug bust operation nga ginhimo sa lugar kagab-i, Pebrero 24.

Subjects sa operasyon kanday alyas Rodney, 40-anyos; Pong, 36-anyos; Bingkay, 58-anyos nga amo ang tanod, lunsay residente sang nasambit nga barangay. Lakip man sa nadakpan si alyas Bernie, 29-anyos nga taga-Maasin.

Suno kay Police Major Marvin Villanueva, deputy chief sang Regional Police Drug Enforcement, si alyas Rodney ang ila nga target kag nagabulig sa iya sa pagbaligya sang illegal nga druga ang tatlo pa.

Nagaserbe naman nga lookout sa mga transaksyon si Bingkay nga barangay tanod.

Nagbug-at sang 205 grams ang 13 ka sachets sang suspected shabu nga na-recover sa operasyon.

Ginahibalo pa sang kapulisan kon diin nagakuha sang supply sang illegal nga druga ang subjects tungod wala sila nagakooperar sa imbestigasyon. — Aksyon Maria Kayla Tingzon