ILOILO— Patay ang 52-anyos nga mangunguma sang gintiro sang kaupod niya sa ilimnan sa Barangay Braulan, San Enrique las-11:50 kahapon sang aga. Marso 13.
Suno kay Police Captain Dandy Ilalto, hepe sang San Enrique Municipal Police Station, upod nga naga-inum ang biktima nga si Felipe, ang suspek nga si Domingo kag ang duha pa ka mga lalaki.
Sa imbestigasyon, naubos na ang ilimnon sang apat. Tungod nga ang suspek ang nagbakal sang una nga ilimnon, ginhambalan sang biktima ang suspek nga magbakal sang dugang pa gid nga ilimnon pero wala na siya sang kwarta.
Tungod sini, nagbaisay ang duha. Ginhanaan sang biktima nga lab-un ang suspek, gani gin-unahan sang suspek gabot sang pusil kag gintiro ang biktima.
Gindala pa sa ospital ang biktima pero gindeklarar nga dead-on-arrival.
Nadakpan naman ang suspek kag preso na subong sa San Enrique police station. — Aksyon Farrah Mae Morano
