ILOILO — Patay ang construction worker sang nakuryente samtang nagapanghimos sang iya gamit sa pagpangisda sa Brgy. Napnud, Leganes.
Suno kay Police Corporal Joefel Amihan, imbestigador sang Leganes Municipal Police Station, pagkatapos obra sa construction kahapon, nagpauli sa ila balay ang napatay nga si Renel Tadifa Salvacion agud ipreparar ang gamit sa pagpangisda.
Pasado las-5 kahapon sang hapon sang naglakat si Salvacion sa pagpangisda kag nagpauli makaligad ang isa ka oras dala ang iya napamunitan.
Nagbalik siya sa suba agud himuson ang iya mga gamit sa pagpanguryente sang isda pero wala na makapauli.
Kaina sang aga, ginpangita si Salvacion sang iya pamilya malapit sa suba kag nasapwan nga may ginauyatan nga kable sa wala niya nga kamot.
Sa pagproseso sang SOCO, nakuryente si Salvacion nga rason sang iya kamatayon.– Aksyon Maria Kayla Tingzon
