ILOILO — Nasapwan na lang nga patay ang 13 ka ido nga ginasagod sang mag-asawa sa Barangay San Jose, San Miguel sang Miyerkules, Abril 29.
Suno kay Police Captain Bryan Alejo, officer-in-charge sang San Miguel Municipal Police Station, las-9 sang aga sang nasapwan sang mag-asawa nga nagalinapta sa ila ugsaran kag sa bakante nga lote sa guwa kag patay na ang siyam nila ka mga ido.
Nakit-an naman ang plastic containers nga ginbutangan sang kan-on nga may samo nga ginapatihan zinc phosphide ukon hilo sa ilaga, sa guwa sang cyclone wire nga nagaserbe kudal.
May kinutkutan sa duta gani nakaguwa ang mga ido.
Pagkagab-i sang Abril 29, may nakita pa ang mag-asawa nga patay nga apat ka ido sa bakante nga lote sa guwa sang kudal.
Sa pagkadumdom sang mag-asawa, Abril 28 mga las-11 sang gab-i tubtob kaagahon, nagatinaghol ang ila mga ido pero wala nila ginsapak.
Ginalantaw nga motibo sang mga pulis nga mga residente nga nasabadan sa mga ido ang may kahimuan sa paghilo sa mga ido.
Ginpa-check sa Municipal Agriculture Office ang mga ido kag ang na-recover nga ginapatihan hilo. — Aksyon Maria Kayla Tingzon
