ILOILO — Dead-on-arrival sa ospital ang asawa samtang ginbulong pa ang bana pero napatay man, sang ginbuno sang ila bata sa Barangay Gemumua-Agahon las-10 kagab-i.
Biktima kanday alyas Nene, 82-anyos, kag alyas Nonoy, 84-anyos. Suspek sa pagpangbuno ang ila bata nga Toto, 46-anyos.
Suno kay Police Lieutenant Colonel German Magbanua, nakabati ang barangay tanod nga kasilingan sang mga biktima nga may nagasinggit gani naglingling siya sa bintana kag nakita nga nagahuray-ad na ang mag-asawa nga may mga pilas sang pagkabuno.
Nagpangayo sang bulig ang tanod agud madala sa ospital ang mag-asawa.
Gin-citizen’s arrest naman nila ang suspect kag gin-turnover sa Passi City police.
Sa pag-imbestigar sang mga pulis, nahibaluan nga pila na ka adlaw nga wala naka-inom ang suspect sang iya maintenance nga bulong sa ginasusprer nga mental condition.
Tungod sa kapigaduhon, wala na makabakal sang bulong ang suspect.
Naka-hospital arrest ang suspect sa psychiatric ward sang Western Visayas Medical Center.
Ginahulat naman ang desisyon sang mga utod sang suspect kon pasakaan siya sang kaso.
Kon madesisyunan, parricide ang kaso nga ipasaka batok sa suspect. — Aksyon Maria Kayla Tingzon
