ILOILO — Dead-on-arrival ang driver sang wing van kag motorsiklo sang nasaga-id kag nabungguan sang service vehicle sang Philippine Army sa Brgy. Bayan, Passi City las 6:52 kaina sang aga.
Ginkilala ang mga biktima kanday alyas Leon, 49 anyos nga driver sang wing van, kag driver sang motorsiklo nga si alyas Roger, 26 anyos sang Brgy. Nueva Union, Passi City.
Suno kay FO1 Jerick John Casamayor BFP Passi City halin sa Iloilo City ang wing van nga may karga nga goods nga i-deliver pa kuntani sa Kalibo.
Nagpundo sa may tiangge ang driver sang wing van agud magbakal sang bottled water, apang sang hana na siya nga magsaka sa salakyan, nahulog kag nagligid ang bottled water gani iya ginhingagaw pulot.
Natabuan naman nga nagapadulong ang salakyan sang Philippine Army nga halin sa Calinog nga may karga nga apat ka personnel kag padulong kuntani sa Jamindan.
Naglikaw pa ang driver sang Phil. Army pero nalab-ut gid ang driver sang wing van.
Tungod sa paglikaw, naglapaw sa pihak nga lane sang karsada ang salakyan sang Phil. Army kag nabungguan naman ang nagapadulong nga motorsiklo nga gina-drive ni Roger.
Gindala sa Don Valerio Memorial District Hospital ang driver sang wing van kag motorsiklo apang gindeklarar nga dead-on-arrival.
