ILOILO — Dead-on-arrival sa ospital ang backrider sang motorsiklo samtang pilason ang driver sang nabungguan sang nagasunod nga delivery truck sa Brgy. Jaguimitan, Passi City, las-9:30 kaina sang aga.
Driver si alyas Ren, 15-anyos sang Brgy. Talongonan samtang angkas si alyas D, 14- anyos, sang Guimaras Village Brgy. Jaguimitan, Passi City.
Suno kay Police Master Sergeant John Hersley Fajardo, imbestigador sang Passi City Police Station, halin sa Brgy. Talongonan padulong sa Brgy. Jaguimitan Proper agud maghampang sang basketball ang mga sakay sang motorsiklo.
Sa imbestigasyon sang pulis, dulhugon ang dalan sang natabuan sang aksidente.
Nagdulog ang motorsiklo agud malikaw kuntani sa manubo nga porsyon sang dalan. Nagpreno naman ang nagasunod nga delivery truck apang nalab-ot ang motorsiklo tungod kargado sang balas kag bato.
Tungod sa impact, natumba ang motorsiklo kag nalasakan sang truck ang backrider.
Nag-surrender sa Passi City Police ang driver sang truck.
May inisyal nga settlement ang kompaniya sang delivery truck kag pamilya sang mga menor. — Aksyon trainee Robert Nietes
