ILOILO CITY — Pilas sa ulo ang naagum sang construction worker sang ginlabo sang binangon sang kasubong nga construction worker sa sulod sang ginatineran nga boarding house sa Villa San Lorenzo Loboc, Lapuz.
Lunsay pangayaw sa siyudad sang Iloilo ang biktima nga si alyas Rey, 47-anyos sang San Lorenzo, Guimaras kag suspect nga si alyas Cyrus, 41 anyos nga tumandok sang Camarines Sur.
Suno Kay Police Lieutenant Joursy Orrica, officer-in-charge sang Police Station 8 sa La Paz, naghagaray nga mag-inum-inom ang mga construction workers lakip na ang suspek kag biktima. Gilayon man nga nagtulog ang mga construction workers pagkatapos sang ila pag-inum-inom.
Sa pagpangusisa sang pulis, nahibaluan nga sang napiyungan ang suspek, ginkadtuan pa siya kag ginapukaw sang biktima gani nasabaran kag napikon tubtob ginkuha ang iya binangon nga may tagub pa, kag ginlabu ang biktima.
Nakabugtaw ang mga kaupdanan sang suspek kag biktima tungod sa komosyon dugang pa ni PLt. Orrica.
Nagapabilin nga confined sa ospital ang biktima. Na-recover naman ang ginabanta 22 inches nga kalabaon sang binangon.
Arestado ang suspek kag nagapangatubang sang kaso nga frustrated murder.
