PASSI CITY — Arestado ang estudyante sa drug bust operation sa Brgy. Sto Tomas, Passi City.
Ginkilala ang subject kay alyas Toto, 19-anyos kag residente sang Sitio San Isidro Brgy. Bitaogan Passi City.
Suno kay Police Captain Joy Melvin C. Dulce, Deputy Chief sang Passi City Police Station kagab-i kuntani ang transaksyon sang mga pulis sa subject pero wala siya nagdayon sa pagbaligya. Las-11 kaina sang aga, natigayon ang transaksyon kag nadakpan ang subject.
Na-recover sa subject ang tatlo ka magagmay nga plastic sachets sang suspected shabu nga nagabug-at sang 15 grams kag nagabalor sang P102,000.
Yara na sa kustodiya sang Passi City police ang subject kag magapangatubang sang kaso nga paglapas sa RA 9165 ukon Dangerous Drugs Act of 2002.
