Granada nakit-an sang manug-scrap sa Bolilao, Mandurriao; EOD na-secure na ang M67 grenade hand fragmentation

ILOILO—Nahingagaw sang Explosive Ordnance Disposal (EOD) sang Iloilo City Police Office (ICPO) nga ma-secure ang granada nga nakit-an sang nagapang-scrap sa Barangay Bolilao, Mandurriao mga las-2 kaina sang hapon.

Suno kay EOD team leader Lieutenant Felipe Flores, Jr., M67 grenade hand fragmentation ang nakita.

Base sa report, nadiskubrehan lang sang manug-scrap nga may granada sa sulod sang vending machine nga lakip sa mga scrap.

Gilayon niya nga gin-report sa tanod kag pulis.

Ginpabutyag ni Lt. Flores nga posible pa nga maglupok ang granada kon wala na-secure sang EOD tungod kompleto pa ang components sang granada. Pero naka-tape naman kag wala pa nabutong ang pull ring, suno kay Flores.

Kon may magbutong sang pull ring, mahimo maglupok sa sulod sang apat tubtob lima ka segundos. — Aksyon Farrah Mae Morano