PASSI CITY – Ginrespondehan sang mga personnel sang Bureau of Fire Protection-Passi City ang duha ka construction workers nga nahulugan sang mga bato halin sa ginakay-o nga dalan sa Brgy. Bayan, Passi City las-10:53 kaina sang aga.
Suno kay FO1 Romel Cosipe sang BFP Passi City, mabutang na kuntani sang tamburong ang mga biktima sa ginkutkot nga duta nga parte sang road widening project sang nahulogan sang mga bato.
Ginabanta sa anum tubtob pito ka tapak ang kadalumon sang ginakay-o nga dalan sang gulpi lang nagkalahulog ang mga bato.
Gindala sa ospital ang duha ka construction worker nga napilasan sa nagkalain-lain nga parte sang ila lawas.
