ILOILO — Nadakpan pasado las-2 subong nga hapon ang preso nga nakapalagyo sa police custody pasado las-9 kaina sang aga.
Suno kay PLTCOL Arnel Solis, hepe sang Oton Municipal Police Station, gindala sa Rural Health Unit sang Oton si alyas Ron para sa medical examination upod ang isa pa ka preso antes isaylo sa Bureau of Jail Management and Penology (BJMP) subong nga adlaw.
Samtang yara sa RHU, naglisensya si Ron nga maggamit sang CR kag ginpasugtan sang pulis nga nagabantay sa iya.
Natingala ang pulis nga nadugayan si Ron sa sulod sang CR kag nakabati sang lagpok.
Sang ginbuksan ang CR, nakit-an nga guba na ang bintana kag nakapalagyo si Ron.
Naghimo sang back tracking ang Oton police paagi sa pag-usoy sang mga gin-agyan ni Ron base sa mga kuha sang CCTV cameras.
May mga residente man sa palibot nga nakamuno nga nakit-an nila ang pagpalagyo ni Ron.
Pasado las-2 subong nga hapon nadakpan si Ron sa Poblacion East, Oton nga nagapahulom-hulom sa open space nga may tubig, suno kay Solis.
Masobra tatlo ka semana nga yara sa detention facility sang Oton MPS si Ron nga may kaso nga rape.
