ILOILO — Nakitaan sang “probable cause” sa ginhimo nga pre-charge investigation sang National Police Commission (NAPOLCOM 6) ang mga issue batok kay Police Captain Ryan Christ Inot, hepe sang Molo Police Station kag duha pa ka pulis.

Matandaan nga 15 ka pulis ang ginpaidalum sa pre-charge investigation sang NAPOLCOM 6 sang Agosto tungod sa mga alegasyon sa mga irigularidad sang Molo police sa gina-conduct nga drug bust operation kag sa natabo nga implementation sang warrant sang PNP Integrity Monitoring and Enforcement (IMEG) kag PNP Special Action Force (SAF) sa sulod sang Molo police Station sang Hulyo 1 batok dismissed police officer Jerry Villanueva sa kaso nga murder.

Sa 15 ka pulis tatlo lang ang ginpasakaan sang administrative case, samtang 12 ka pulis ang wala nakitaan sang probable cause.

Suno kay Atty. Michelle Yotoko, spokesperson sang NAPOLCOM 6, naestablisar nga wala nadakup sang Molo police si Villanueva nga yara lang sa guwa sang station bisan nga nahibaluan nila nga may warrant of arrest.

Magluwas sini, naabtan man sang PNP-IMEG ang isa ka Person Under Police Custody nga yara sa guwa sang custodial facility sang estasyon sang nag-conduct sila sang operation.

ANO NGA ADMINISTRATIVE CASE ANG IPASAKA SA TATLO KA PULIS?

Suno kay Atty. Yotoko, may “formal charges” nga gin-issue ang NAPOLCOM 6 batok kay Capt. Inot kag sa duha pa niya kaupod nga pulis.

Grave misconduct kag Grave neglect of duty ang ginapangatubang nga administrative case ni Inot.

Samtang, ang duha ka police Grave irregularity in the performance of duty.

ANO ANG STATUS NI CAPT. INOT SUBONG?

Sa subong si Capt. Inot gihapon ang hepe sang Molo Police Station.

Ginpaathag ni Atty. Yotoko nga ginatugyan na nila sa PNP ang desisyon kon madagdag sang administrative relief order kay Inot kag sa duha pa ka pulis.

Sa subong suno kay Atty. Yotoko, naga-undergo na sa summary dismissal proceeding ang NAPOLCOM kay Inot kag ang duha pa ka pulis.

Kon mapatud-an nga guilty ang mga natungdan nga pulis base sa mga ebidensiya posible nga ma-dismiss sila sa serbisyo, demotion sa ila rangko, kag 60 days suspension.

Depende sa mangin resulta sang ebidensiya suno kay Atty. Yotoko ang mangin penalty sa pulis.