ILOILO— Nagapaayo na ang 86-anyos nga tigulang nga una gin-report nga missing sang nahulog sa sapa sa Brgy. Talacu-an, Leon.
Suno kay Ariane Cambel, assigned nga operations section chief sang Leon Municipal Disaster Risk Reduction and Management Office (MDRRMO), nakit-an nga nagbiya kahapon sang aga ang tigulang sa iya balay nga may dala nga binangon.
Ginabawalan nga magguwa ang tigulang para magpangahoy pero wala nagapati, suno pa kay Cambel.
Wala nakapuli ang tigulang kagab-i gani gin-report sang iya pamilya sa ila barangay.
Kaina sang aga, ginpangita ang tigulang kag nabatian nga may ido nga nagatinaghol sa sapa. Didto kag natukiban ang tigulang nga nagahigda sa kilid sang sapa.
Ginpabutyag sang tigulang nga nakadanlog siya sa manubo nga pil-as kag nahulog. Indi na masarangan sang tigulang nga magtaklad gani wala na nagbangon para nagpauli.
Wala sang pilas sa lawas ang tigulang pero nagreklamo sang pagpalanakit sang likod.
