ILOILO — Manotisyaran na ang usmod sa porsyon sang Ungka Flyover.
Ini ang base sa obserbasyon sang Aksyon Radyo Iloilo News Team sang liwat nga ginbisitahan ang imprastruktura.
Liwat man nga gindanaw ang area sa diin makit-an ang pag-usmod.
Daku man ang nakit-an nga kat-al sa timabuan sang girders sa ibabaw sang mga haligi nga may pinakadaku nga pag-usmod.
Una na nga gin-report ni DPWH 6 Assistant Regional Director Engr. Jose Al Fruto nga wala na nagahulag ang ika-apat, ikalima kag ika-anum nga haligi sang Ungka Flyover.
Nagguwa man sa imbestigasyon sang Abinales Associates, Engineers + Consultants, ang third party consulting firm nga nag-imbestigar sa Ungka Flyover, nga magluwas sa naga-usmod nga mga haligi may paghulag man nga na-monitor sa 13 pa ka nabilin nga mga pundasyon.
