ILOILO — Natiruhan sang on-duty security guard sang GT Town Center ang mag-utod nga nag-agaw sang iya service firearm sa Ungka II, Pavia las 12:45 kaina sang kaagahon.
Suno kay Police Major Bonifacio Alabe, Jr., sakay sa motorsiklo, ginsulong sang mag-utod ang guwardiya agud agawon ang iya pusil pero nagbato kag natiruhan ang isa sa mag-utod gamit ang 12 gauge shotgun tungod ginsumbag pa gid siya.
Napilasan sa tiyan ang isa sa mag-utod nga gindala sa ospital samtang nagpalagyo ang utod niya.
Pero nagbalik sa crime scene dala ang isa pa gid ka utod nila.
Tungod sini, nadakpan sang police ang utod nga kaupod sang natiruhan.
Gin-detain naman sa Pavia Police Station ang guwardiya.
Pellet gun ang gintaya sang mag-utod sa security guard.
Posible may daan nga hiligut-anon ang isa sa mga nag-agaw sang pusil sa guwardiya tungod naka-agi man siya guwardiya sa mall, dugang ni Alabe.
