ILOILO CITY – Tuman kadaku ang halit sa mga pumuluyo kag ekonomiya ang halos adlaw-adlaw nga power interruptions indi lang sa siyudad pero sa Western Visayas tungod sa kakulang sa supply sang elektrisidad sa Visayas grid.
Ini ang ginpabutyag ni Mayor Raisa Treñas sang gin-endorso sa meeting sang Regional Development Council ang resolution sa pagdeklarar sang state of calamity sa Western Visayas tungod sa energy crisis.
Sa meeting, nagtambong si Energy Secretary Sharon Garin kag nagkalain-lain nga stakeholders kag concerned agencies agud diskusyunan ang sitwasyon sa supply sang elektrisidad sa rehiyon.
Suno kay Treñas, ginplastar ni Garin ang mga tikang nga ginahimo sang DOE agud mapahagan-hagan ang power interruptions. May mga planta nga ginapaabot nga mag-estable na ang supply sang elektrisidad subong nga bulan.
Ginpabutyag sang alkalde nga indi lang sa kakulang sa supply sang elektrisidad ang ginapangatubang nga problema sa syudad pero ang panibag-o nga pagsaka sa presyo sang gatong.
Prayoridad sang Iloilo City Government nga mabuligan ang sektor sang negosyo tungod sa duha ka problema nga gina-abaga sang mga pumuluyo.
