ILOILO — Na-recover ang illegal drugs, drug pharaphernalia, kag duha ka keypad nga cellphones sa gin-conduct nga Joint Greyhound Operation sa Iloilo District Jail – Male Dormitory kag Iloilo District Jail – Male Dormitory Annex sa Barangay Nanga, Pototan.
Suno kay Atty. Juniven Umadhay, spokesperson sang Bureau of Jail Management and Penology (BJMP), tatlo ka gramo sang suspected illegal drugs nga naga balor sang P20,400 ang nakuha sa greyhound operation.
Samtang, tag-isa ka cellphone ang nakuha sa duha ka jail facility.
Ginhimo ang operation suno kay Atty. Umadhay tungod nga luyag sang bag-o nila nga regional director nga si Jail Chief Superintendent Elena B. Rocamora, PhD, nga masigurado nga wala sang mga anomaliya sa mga jail facilities sa rehiyon sa iya termino.
Magluwas sini, may mga reklamo nga nabaton ang BJMP 6 sa nagakatabo sa mga jail facilities.
Ka-upod sang BJMP 6 sa amo nga operasyon ang Philippine Drug Enforcement Agency (PDEA 6).
