ILOILO— Arestado ang 18-anyos nga ginreklamo nag-eskandalo tungod wala siya ginbaligyaan sang ilimnon sa Barangay Tuble, San Dionisio.
Ginkilala ang nadakpan kay Alyas Kim, 18-anyos sang Barangay Capinang, San Dionisio.
Suno kay Police Captain Jesus Batilante Jr, hepe sang San Dionisio Police Station, una sila nga nakabaton sang report nga may lalaki nga nagawaras tungod wala ginbaligyaan sang ilimnon tungod manirado na ang tag-iya.
Nangakig si Kim, ginsipa ang tyangge kag gintayaan pa sang screw driver ang tag-iya samtang nagawaras, suno sa pulis.
Nagresponder ang barangay tanod kag nagdalagan ang lalaki pero nalab-ut siya.
Nadiskubrehan sang Punong Barangay nga may ginasukbit nga pusil ang lalaki.
Nagtawag sila sang pulis kag na-recover ang .38 caliber revolver kag may nakuha pa gid sang duha ka sachets sang suspected shabu, lighter, aluminum foil kag kwarta.
Masami nga involved sa ginamo sa banwa ang lalaki, suno pa sa pulis.
Ginpasakaan ang lalaki sang kaso nga Alarms and Scandal, violation sa Comprehensive Firearms and Ammunition Regulation Act kag Comprehensive Dangerous Drugs Act.
