Doktor nga driver sang awto nga naka-hit-and-run sa tiyangge, traysikol sa Baldoza, La Paz pilason sang ginlagas kag gintiro sang nagresponder nga mga pulis

ILOILO CITY — Napilasan sa tiyan ang driver nga doktor sang ginlagas kag gintiro sang nagresponder nga mga pulis ang iya salakyan nga nakabunggo sa mga baligyaan kag traysikol sa Brgy. Baldoza, La Paz kahapon sang kaagahon, Oktubre 11.

Base sa imbestigasyon sang Iloilo City Police Office (ICPO) may nagtawag sa 911 hotline gani nagresponder ang mga pulis.

Suno kay ICPO Director PColonel Wilbert Parilla, naabtan pa sang mga pulis ang awto, ginpalapitan kag ginhambalan ang driver nga maggguwa. Pero imbes nga magtuman, ginpadalagan sang driver ang salakyan gani ila gintiro pakadto sa Brgy. Caingin, La Paz.

Nagpakilala nga himata ni Mayor Raisa Treñas ang driver nga ginkumpirmar naman sang alkalde nga iya pakaduha sa maternal side.

Optometrist ang profession sang driver nga padayon nga ginabulong subong sa Iloilo Saint Pauls Hospital.

Ginmandu sang ICPO ang pag-relieve kag pag-disarma sa tatlo ka pulis nga nagresponder sa lugar bilang Standard Operating Procedures (SOP) samtang gina-imbestigaran ang insidente.