Bata sang manuglibod utan sa Carles nga Rank 1 sa Fisheries board exam, nakabaton sang ₱100,000

ILOILO – Si Gerson Celeste Berano, graduate sang Northern Iloilo State University (NISU) ang nagpangibabaw sa October 2026 Fisheries Professional Licensure Examination.

Bata siya sang manuglibod utan nga tumandok sang Brgy. Tinigban, Carles. Nag-graduate si Berano nga cum laude.

Nakatapos sa pagtuon si Berano paagi sa pagtinguha sang iya iloy kag mga utod. 12-anyos pa lang siya sang napatay ang iya amay.

Kaina sang aga, nakabaton si Berano sang ₱100,000 nga cash incentive halin sa NISU sang nag-Rank 1 siya sa nasambit nga pasinawan sa diin naka-record sang 90.25% nga rating.

Magluwas sa iya, nakabaton man kanday Regie Villa Pancho nga nagtupa sa ika-pito nga puwesto, kag Aleanna Marie Gulapo Pancho nga yara sa ika-siyam nga puwesto sa nasambit nga pasinawan, sang tag-₱25,000.

Ginpanginbulahan naman sang NISU ang ila graduates tungod sa pagdala sang kadungganan sa unibersidad.