Iloilo provincial government nagpatuman sang istrikto nga quarantine measures kontra RSSI infestation

ILOILO — Nagpatuman sang istrikto nga quarantine measures ang Iloilo Provincial Government agud mapunggan ang paglapta sang red-striped soft scale insect (RSSI) sa pila ka kabanwahanan sa probinsya.

Ini paagi sa Executive Order No. 143 nga ginpirmahan ni Governor Arthur Defensor, Jr., agud mapatuman ang province-wide nga quarantine zones, restriction, mandatory disinfection, regular nga pagmonitor sang peste kag bulig para sa mga apektado nga mangunguma.

Gin-classify sa apat ka quarantine zones ang mga katubohan nga apektado sang RSSI depende sa kahalitan kag kadakuon sang crop damage.

Red zones kon indi magnubo sa 50 porsyento ang validated sugarcane area nga nahalitan sang RSSI infestation. Ang amo nga mga area ipaidalum sa istrikto nga quarantine kag containment measure.

Kon yara sa 20 tubtob 49 porsyento sang sugarcane areas ang kahalitan sang infestation, ipaidalum ini sa Orange zones.

Samtang, Yellow zones kon magnubo sa 20 porsyento ang kahalitan.

Green zones kon yara sa 10 porsyento ang crop damage ukon wala sang kumpirmado nga infestation.

Pangunahan sang Provincial Agriculture Office, upod ang Sugar Regulatory Administration (SRA) kag Bureau of Plant Industry (BPI) ang pag-check sang mga zones kada bulan ukon may surveillance report nga may yara sang pagbag-o sa infestation level.

Lakip man sa ipatuman ang pagkontrol sang mga sugarcane planting materials, seed canes, cane tops, mga makinarya sa uma, kag equipment base sa klasipikasyon sang sugarcane areas.

Kinahanglan sa Red zones ang mandatory disinfection, certificate of disinfection kag clearance halin sa PAO kag SRA antes makahalin ang mga materyales kag equipment.

Sa Orange zones, kinahanglan ang disinfection kag certification, samtang sa Yellow zones, kinahanglan ang disinfection kag certificate para sa mga materyales nga ipadala sa mga sugar mill.

Epektibo sa sulod sang pito ka adlaw ang certificate of disinfection.

Ginmanduan ang tanan nga sugar mill sa Iloilo nga magpatindog sang disinfection stations sa tanan nga entry kag exit points, kag magpangayo sang valid nga certificate antes magbaton sang mga materyales halin sa Red, Orange kag Yellow zones.

Matandaan nga ginpaidalum sa state of calamity ang probinsya sang Iloilo tungod sa RSSI infestation, sa diin kapin 7,000 ka ektarya nga katubohan ang nahalitan, apektado ang kapin 9,000 ka mangunguma sa 27 ka kabanwahan sa probinsya.

Sa kabug-usan nga 20,749.88 ka ektarya sang katubohan sa probinsya, 34 porsyento ang nahalitan sang RSSI.