ILOILO—Ginpasar sa regular session sang Sangguniang Panlalawigan (SP) ang resolution nga temporaryo nga maga-ban sa pagpasulod sang imported live hogs kag pork sa probinsya sang Iloilo.
Ini suno kay 2nd District Board Member (BM) Rolito Cajilig, Chairman sang Committee on Agriculture kag sponsor sang amo nga resolution.
Base sa bag-o nga datos, 87 porsyento ang swine sufficiency stock level sang probinsya.
Bastante na ang amo nga porsyento sang stock level sa tanan nga konsumedor, gani temporaryo nga i-ban ang pagpasulod sa probinsya sang mga live hogs kag pork halin sa Guimaras, Antique, kag Negros.
Epektibo ang amo nga resolusyon halin Nobyembre 1 tubtob Disyembre 31.
Tinutuyo man sini nga ma-aksyonan ang reklamo sang kalabanan nga mga Ilonggo nga hog raisers kag farmers nga wala na sila sang kita tungod nagnubo na gid ang farmgate price kon nagasaka man ang tanan nga balaklon kapareho sang hog feeds, bulong, kag bitamina para sa mga baboy.
Base sa latest data, ₱130 tubtob ₱170 ang farmgate price. Dugang pa ni BM Cajilig, indi balanse ang market price, sa diin naganubo ang farmgate price apang nagasaka naman meat price halin ₱230 tubtob ₱350.
Pananglitan pasugtan ang pagpasulod pa sang live hogs kag stock sa guwa sang Iloilo province, dugang ini nga kapierdihan sang mga hog raisers kag farmers, suno pa kay BM Cajilig.
