ILOILO— Ginkawat ang kwarta para sa Christmas Party sang Sulangan Elementary School canteen sang anum ka menor-de-edad sa Barangay Sulangan, Dumangas kahapon sang kaagahon. Nobyembre 13.
Lunsay out of school youth ang anum ka menor-de-edad, suno sa pulis.
Kaina sang aga, nadiskubrehan sang maestra naguba ang kandado sang classroom kag ‘missing’ ang zest-o box nga may unod nga sensilyo nga kwarta para kuntani sa Christmas party.
Ginabanta P2,000 ang sulod sang zest-o box.
Suno kay PCPL. Jun Rey Rubito sang Dumangas Municipal Police Station, la-1:30 kaina sang kaagahon nakabaton sang report ang pulis nga may nakakita sa grupo sang mga menor-de-edad nga nagapanghaboy sang bato sa mga truck nga naga-agi sa karsada.
Ang nakakita, motorista nga pauli na kuntani sa ila balay sa amo nga banwa sang nalabayan ang grupo sang mga menor-de-edad.
Ginsaway sang motorista ang grupo sang menor-de-edad gani nagpalagyo.
Nahawiran sa kamot sang motorista ang isa ka menor-de-edad nga si alyas Botod pero nagwaras gani nakapalagyo man.
Nakita sa ginpwestuhan sang mga menor-de-edad nga may nagalinapta nga mga sensilyuhon.
Sa imbestigasyon sang pulis, ang naglinapta nga sensilyuhon amo ang nadula nga kwarta sang eskwelahan.
Kaina sang hapon ginpatawag sang pulis ang ginikanan ni Botod agud ipahibalo ang ginhimo sang ila bata.
Ginpaidalum sa Women and Children Protection Desk (WCPD) si Botod para sa nagakaigo nga intervention.
Padayon pa ang imbestigasyon sang pulis agud matumod ang lima pa ka menor-de-edad nga involved.
