Babaye nga masakay na kuntani sa jeep patay sang nabungguan sang multicab sa San Joaquin

ILOILO—Dead-on-arrival sa ospital ang babaye nga nagapasakay na kuntani sa jeep sang nabungguan sang multicab sa Barangay Bucaya, San Joaquin.

Ang biktima si alyas Candi, 45-anyos, kag residente sang Barangay Siwaragan sa amo nga banwa.

Suno kay Police Lieutenant Marvin S. Sandig, deputy chief sang San Joaquin Municipal Police Station, gindul-ong sang iya bana si Candi sa highway tungod malakat pa-Iloilo City.

Nagpara sang San Joaquin nga jeep si Candi kag sang pasakay na sa jeep gulpi lang nabungguan sang Rusco multicab nga nagasunod.

Nagkalain-lain nga anggulo ang ginalantaw sang pulis sa ginhalinan sang aksidente.

Posible nga gulpiyada nga nagpundo ang jeep agud mag-pick-up sang pasahero kag madasig ang pagpadalagan sang nagasunod nga multicab.

Nakita man sa imbestigasyon nga sang nag-pickup sang pasahero ang jeep, wala nagpahigad sa kilid kag posible na-alang-alang ang nagasunod nga multicab.

Nakaagum sang patal nga pilas sa ulo, dughan, kag tiil si Candi kag gilayon nga gindala sa ospital, pero gindeklarar nga dead-on-arrival.

Samtang, nakaagum naman sang pilas sa nagkalain-kalain nga parte sang lawas ang driver sang multicab gani gindala man sa ospital para ipaidalum sa x-ray.

Gin-custody sang San Joaquin MPS ang driver sang multicab.

Nagkadto naman ang pamilya ni Candi sa police station kag na-istoryahan nga patapuson ang iya lubong antes magdesisyon kon mapasaka sang kaso batuk sa suspek, dugang pa ni Sandig.