Balay sa Lambunao nasunog; upos sang sigarilyo ginalantaw ginhalinan sang kalayo- BFP Lambunao

ILOILO — Nasunog ang balay sa Barangay Poblacion Ilawod, Lambunao, Iloilo las-8:14 kagab-i.

Suno kay Fire Officer (FO) 2 Kehner Labayno sang Bureau of Fire Protection (BFP) Lambunao, gilayon nila nga ginrespondehan ang sunog sang nakabaton sang report halin sa Municipal Disaster Risk Reduction and Management Council (MDRRMC) sang Lambunao.

Sa inisyal nga imbestigasyon, samtang yara sa sulod sang balay ang tag-iya sang balay, nakibot na lang siya sang gulpi nagkalayo ang sofa sa balay.

Antes ang sunog, naga-inum-inom sang makahulubog nga ilimnon kag nagapanigarilyo ang tag-iya sang balay nga ginalantaw ginsuguran sang sunog, suno sa BFP.

Yara sa P19,600 ang kahalitan sang sunog.

Padayon pa ang imbestigasyon sang BFP Lambunao sa natabo.