ILOILO– Nadakpan sa drug buy bust operation ang barangay kagawad kag menor-de-edad sa Brgy. Tap-oc, Molo kahapon snag kaagahon, Agosto 25.
Ginkilala ang kagawad kay alyas Bon-bon, 39-anyos sang Brgy. South San Jose, Molo kag 16-anyos nga residente sang Brgy. Tap-oc.
Suno sa report sang Police Regional Office 6, nahuman ang operasyon sang Iloilo City Drug Enforcement Unit (CDEU) pagkatapos sang intelligence validation, surveillance, kag target profiling.
Nakumpiskar ang 90 grams sang suspected shabu nga may standard drug price nga P612,000.
Presu ang kagawad samtang ginaproseso ang dokumento sang menor-de-edad para iturn-over sa Balay Dalayunan sa Brgy. Barrio Obrero.
Ginpanginbulahan ni PRO6 Regional Director Police Brigadier General Randulf Tuaño ang mga operatiba sa ila madinalag-on nga operasyon.
“NAKIBOT KAMI NGA MGA BARANGAY OFFICIALS”— South San Jose, Molo PB Arnold Villoga
Nakibot ang tanan nga mga barangays officials sang Brgy. South San Jose, Molo sang nadakpan ang ila kagawad sa drug buy bust operation.
Ginkilala ni South San Jose, Molo Punong Barangay Arnold Villoga ang nadakpan kay Kagawad Ernisto Cordova.
Ginpabutyag ni Villoga nga wala na-monitor nga naga-engage sa illegal nga aktibidad si Cordova.
Sa first term niya, aktibo sa barangay si Cordova kag chairman pa sang Committee on Peace and Order.
Tanan nga mga insidente kag aktibidad present si kagawad Cordova, suno pa kay Villoga.
Mahilig naman mag-grupo-grupo ang kagawad base sa obserbasyon sang kapitan.
Wala na nahibaluan ang mga aktibidad ni Cordova sa guwa sang ila nga barangay.
Sa operasyon sang City Drug Enforcement Unit (CDEU) na-recover ang 90 grams sang suspected shabu nga may standard drug price nga P612,000. Upod ni Cordova ang 16-anyos nga menor-de-edad.
