ILOILO CITY — Nakaagum sang pilas sa guya, wala nga ilok, tuo nga parte sang dughan kag tangkugo ang construction worker sang ginbuno sang cutter sang kasubong nga construction worker sa construction site sa Brgy. Ortiz, City Proper las 10:55 kagab-i.
Suno kay Police Staff Sergeant Alberto Espinosa, imbestigador sang ICPO 1, naghagaray nga mag-inum inom ang anum ka construction workers lakip ang suspect nga si alyas Jelson, 33-anyos sang Brgy. Posadas, Sara, kag biktima nga si alyas Joel, 32 anyos sang Brgy. Taro, Tigbuan.
Naglisensiya nga mauna tulog ang apat ka construction workers, samtang nagpadayon sa pag-inom ang suspect kag biktima.
Nabatian pa sang kaupdanan sang duha nga may pagbaisay kag komosyon apang wala nila ginsapak sa pagpati nga hubog lang ang suspek kag biktima.
Apang sa pagpangusisa sang mga pulis, nahibaluan nga nagtapungulay sanday Jelson kag Joel sa diin wala nakabalos sang sumbag ang suspect gani ginkuha niya ang cutter kag ginbuno ang biktima sang makapila ka beses.
Padayon nga ginabulong sa ospital ang biktima, samtang arestado ang suspek kag natalana pasakaan sang kaso nga frustrated homicide, suno sa pulis.
