ILOILO – Gindala sa ospital sa siyudad sang Iloilo ang driver sang awto sang nabun-an sang naga-motorsiklo sa Brgy. Magdalo, Banate las 8 sang aga.
Suno kay Police Lieutenant Cherry Demarana, Hepe sang Banate Municipal Police Station, nagamaneho sang awto ang biktima nga si alyas Nonoy, 40-anyos samtang nagamaneho sang motorsiklo ang suspek nga si alyas Jun, 35-anyos kag lunsay padulong sa Banate proper ang direksyon.
Sa imbestigasyon, nagasinggitanay ang duha samtang nagabiyahe tubtob naghangkatanay sang inaway. Nagdulog ang duha sa Barangay Magdalo kag nagtapungulay tubtob naggabot sang pusil ang suspek, samtang naggabot naman sang kutsilyo ang biktima.
Gintiro sang suspek ang biktima pero wala naigo tubtob nag-agaway sila sang kutsilyo, na-agaw sang suspek kag ginbuno sang makapila ka beses ang biktima.
Nakaagum sang pilas sa kamot, dughan kag tuo nga parte sang liug ang biktima.
Nadakpan sa hot pursuit operation ang suspek. Na-recover sa luagar ang 38 kalibre nga pusil kag ang kutsilyo.
Sa pagpangusisa sang pulis, masami nga ginasinggitan sang biktima ang suspek.