ILOILO — Pilason ang driver sang motorsiklo sang gintiro sa Sara Road nga sakop sang Brgy. Poblacion Ilawod las 3:05 kaina sang kaagahon.
May duha ka pilas sang pagkatiro sa buli si alyas Jem nga residente sang Brgy. Agtabo, Passi City.
Suno kay FO1 Jerick John Casamayor sang BFP Passi City, sa ila initial nga pagpangusisa, naga-inum-inom ang biktima sa videokehan kaupod ang suspek.
May nagluntad nga komosyon sa tunga sang biktima kag suspek rason nga naglikaw na lang siya kag nagsakay sa iya motorsiklo.
Pero wala naglaum ang biktima nga ginsundan siya sang suspek paguwa sa videokehan kag gintiro .
Suno kay Jem, makapila ka beses siya ginpalukpan sang suspek gani ginpadasig niya sa pag-drive ang iya motorsiklo tubtob nga nadisgrasya siya.
Nakabaton sang impormasyon ang mga miyembro sang BFP Passi City nga may nadisgrasya gani nagresponder sila sa lugar.
Nagtawag sa police kag gindala sa Don Valerio District Hospital ang biktima para sa dugang nga pagbulong.
Nagapadayon ang hot pursuit operation sang mga pulis kag pag-check sang mga CCTV camera sa area agud ma-identify ang suspect. — ARI trainee Romel Lavilla
