ILOILO– Dead-on-arrival sa ospital ang 21-anyos nga driver sang motorsiklo sang nakabunggo kag nagsuhot sa ten-wheeler truck sa Brgy. Sapao, Dumangas kahapon, Marso 28.
Suno kay PSSG John Mark Tuazon, imbestigador sang Dumangas Municipal Police Station, pakadto sa Dumangas port ang ten-wheeler truck sang nasugata ang motorsiklo.
Sa pagpangusisa sang police, madasig ang pagpadalagan sang driver sang motorsiklo rason nga pag-abot sa kurbadahon nga porsyon sang dalan, naglapaw sa linya kag nakabunggo sa ten-wheeler truck.
Ginpahayag sang police nga naghingagaw pa likaw ang ten-wheeler truck pero tungod sa madasig ang pagpadalagan sang driver, nagsuhot siya kag naguyod, mga 10 metros ang kalayuon.
Wala nakasuksok sang helmet ang 21-anyos nga driver sang motorsiklo.
Gin-aresto ang driver sang ten-wheeler truck kag detained na sa Dumangas police station samtang ginahulat ang desisyon sang pamilya sang napatay.
Driver sang motorsiklo patay sang nabungguan sang 10-wheeler truck sa Dumangas
