Driver sang water tanker truck nagpalagyo sang na-isulan ang 2 ka nagasundanay nga SUVs samtang nagapasaka sa Jalandoni flyover

ILOILO CITY—Na-damage ang unahan nga porsyon sang duha ka nagasundanay nga SUV sang na-isulan sang water tanker truck samtang nagapasaka sa Jalandoni Flyover las-9:50 kahapon sang aga, Hulyo 29.

Ginamaneho sang 59-anyos nga taga-Negros Occidental ang water tanker.

37-anyos nga babaye naman ang nagamaneho sa una nga SUV kag 59-anyos nga lalaki sa ikaduha nga SUV.

Suno kay Police Executive Master Sergeant Rene Aguinaga, Assistant Chief sang Traffic Enforcement Unit sang Iloilo City Police Office (ICPO), halin sa direksyon sang Infante ang water tanker truck kag pasaka na sa Flyover sang na-alang alang kag na-isulan ang duha ka nagasunod nga SUV.

Posible nadulaan sang control sa manibela ang driver sang water tanker truck nga loaded sang tubig, suno kay Aguinaga.

Ginpahayag sang police nga pagkatapos sang insidente, nagpalagyo ang driver samtang ginbilin ang water tanker truck sa lugar.

Wala sang may napilasan sa insidente, suno sa police.