ILOILO— Madugay na nga gina-monitor sang kapulisan si Jezryl Ajeto, ang nadakpan sa drug buy bust operation sang City Drug Enforcement Unit sa Barangay Kauswagan, City Proper sang Mayo 14 sang gab-i.
Taga-Bakhaw, Mandurriao si Ajeto nga ginakabig sang police high value individual drug personality.
Suno kay Police Captain Ryan Christ Inot, team leader sang Regional Police Drug Enforcement Unit (RPDEU) 6, nakaagi na nila nga gin-operate si Ajeto sa Molo sang Abril upod ang isa pa ka subject pero nakapalagyo siya.
Base sa monitoring sang kapulisan, si Ajeto ang naga-distribute sang illegal drugs sa Iloilo City kag ginakabig nga “right hand” sang drug personality nga si Nognog Prevendido, nga ginatudlo sang mga durugista nga ginakuhaan nila sang supply sang illegal drugs.
Sa subong, wala pa sang ideya ang police kun diin na si Prevendido.
Gindugang ni Inot nga si Ajeto ang live-in partner sang bata ni Nognog nga si Averose Prevendido nga nadakpan man sadto sa drug buy bust operation sa Bakhaw, Mandurriao. — via Aksyon Farrah Mae Morano
