Indi bilog nga Iloilo City kundi portion lang sang siyudad ilabe na sa mga lugar nga may pinaka-importante nga events sa Dinagyang Festival ang sakop sang ginhingyo nga signal shutdown sang Iloilo City Police Office.
Ginpahayag ni ICPO Director Police Colonel Leo Batiles nga bisan siya ang natingala kun ngaa naglapad kag naglab-ut na sa kaiping nga kabanwahanan kag sa Guimaras ang signal shutdown.
Suno sa iya, portion lang sang City Proper area kag Mandurriao area ang nabutang sa ila request gani wala siya sang ideya kun ngaa apektado man ang iban nga distrito sang siyudad pati na ang Oton, Pavia, Leganes kag Guimaras.
“Ang aton nga request kumbaga gamay lang nga portion sang area diri sa City Proper kag dira sa Mandurriao area. So, galeng natingala lang kita nga tama ka lapad sang scope nga nadula ang signal. So, indi na naton ma-explain. Basta ang akon ‘ya nga side, sa PNP nga gamay lang nga portion sang area diri sa Iloilo City, indi bilog nga Iloilo City ang gin-request naton kundi portion lang sang pinaka-importante nga event sa Dinagyang.”
Kinaandan na nga ginahimo sang ICPO ang pag-request sang signal shutdown sa tiun sang Dinagyang Festival bilang kabahin sang security measures sa kahiwatan.
Ginbaha sang mga reklamo ang duha ka adlaw nga signal shutdown bangud madamo nga online businesses kag online transactions ang naapektuhan.
